Мен үшін қазіргі таңда теңдесі жоқ ақындардың бірі Ершат Қайболдин @ershat_kaiboldin бауырымның "МЕН ҚЫЗ ІЗДЕЙМІН" атты "шытырман оқиғалы" шығармасының желісі бойынша. .
МЕН ТОЙ ІЗДЕЙМІН
.
Мен той іздеймін...
Қонақ саны кем дегенде жүз болатын,
Көрген адам көре алмай, қызғанатын,
Қариялар ақ батасын ақтарғанда,
Әр мейманның жүрегінде із қалатын.
.
Мен той іздеймін...
Қонақ саны екі жүзден кем болмайтын,
Өзге тойлар ұқсамайтын, тең болмайтын.
Көрсем болды, басқару - міндет емес,
Асаба да емеспін ғой мен ондай тым.
.
Мен той іздеймін...
Қонақ саны болатын үш жүз адам,
Үш жүз адам байланатын жіпсіз маған.
Артық кетсем ұрсыншы біреу мені
Құрысыншы, әрі кетсе тіссіз қалам!
.
Мен той іздеймін...
Төрт жүз адам тойлай тұғын түнімен,
Төрт жүз түрлі, бірі асқан бірінен.
Төрт жүз адам тілек айтсын төрт сағат,
Асықпайтын адамдардың бірі - мен.
.
Мен той іздеймін...
Бес жүз адам жиналған әр қаладан,
Қалмасын жан өз тілегін арнамаған.
Той иесі шынайы алғыс айтса
Содан асқан жетістік бар ма маған?
.
Мен той іздеймін...
Мүмкін емес, қиын тіпті сенуге,
Зар болдық-ау тойда шашу теруге.
Хабарласса екен біреу "Той бар!" деп,
Қонақ саны жетпесе де елуге.
.
Мен той іздеймін...
Болсын мейлі отыз адам, он адам,
Он адамның өзі маған мол адам.
Бір тілегім - бітпесін той қазақта!
Мен осымен әңгімемді доғарам...
.
АЗАМАТ АЙНАГУЛОВ
2020 жыл
Карантин айы
